أنا أتغيـر ؟ إذا أنا أعيش ..

-

البرد .. تحيا فيه مشاعري! الصيف سبات لها ..
في الصيف أكون إنسانه لاهيه .. متفرغه للناس وناسيه نفسي .. منشغله ذهنياً وجسدياً ..
أبحث عن كل شئ برا !
وروحي جوّا لحالها .. حتى ما أسمح لها إنها تطير وتشوف الدنيا .. أحبسها وأمشي ..
أخاف عليها من الناس الكثيره اللي تطلع بالصيف …
يمكن الكل يحبس روحه وقتها !؟
السنه قرّبت تنتهي .. هالسنه صح أتعبتني .. بس كانت أريح من غيرها كثير ..
كبرت شويّ ! وعقلت شويّ ..
ممم فهمت الناس أكثر ! وطبعاً أكيد فهمت نفسي أكثر وأكثر ..
حاولت أصلحها .. تعبت منها !
أنا بطبعي مو عنيده أبد .. بس لما أبي أغير يطلع العناد !
تعرفون لما يجي مريض يخاف من الطبيب ؟ مع ان الطبيب هو اللي بيعالجه ويخليه يطيب بعد الله طبعاً ..
انا كذا .. العلاج ! ما أبيه ! .. ليه ؟ أخاف ؟ من ايش ؟ ما ادري..
بعد صراع طويل .. تطورت .. تغيرت .. لملمت نفسي بعد ماكانت مشتته ..
كنت زي الكيس المنثور عالرصيف .. كل الناس تمشي ولاتلفتت له ..
صرت أقوى من داخل ! صح للحين دمعتي على طرف
بس برضو صرت أقوى .. صرت أعرف وش لي ! وش عليّ ..
وش أبي ! وش ما أبي !
متى أتكلم..متى أسكت ..
مازلت جاهله ..
مازلت صغيره ..
مازلت مشتته ..
مازلت أضعف مما أتصور !
لكني صرت أعرف الاتجاهات !
دائماً كنت لما تضيق فيني الوسيعه .. وأحس إني محتاجه أبعد .. لـ بعيد ! أروح وأطفي أنوار الغرفه وأتخبا تحت فراشي
وأصييييح أصيييييح !
وتجي ماما ، تقول وش فيك ؟ لاتضيقين صدري !
كنت غبيه!
باين علي الضيق بس ابيها ماتحس اني متضايقه ! أجي اقولها : مافيني شئ ! وأبين البنت القويه
بس هي بكذا ماترتاح لااا تزيييييد ضيقتها ضيقه !
بس ماكنت ادري ! كنت أبي أبين لها اني قويه .. وهي تظهر لي اني نجحت ، دائماً تقولي أنتي قويه ! أنتي مايهزك شئ !
بس أدري أنها من جوّا تدري قد ايشششش بنتها ضعييفه !
لما جت الأيام اللي أحس إني بأفقدها ..
بكيييييييييييييت وياشينها من ليالي ! والله لايعيدها من أيام .
كرهت كل شئ حولي .. كرهت الناس كلهم ! حتى اللي احبهم !
لانهم ما كانوا حاسين ! ياللله
سنه الـ 2007
هربت .. لأن الموقف كان أقوى مني ..
لما راح معها أبوي .. ممم كنت متوقعه هالشئ ! بس ماتوقعت بيوم من الأيام بأشوفه على أرض الواقع !
ماتوقعت بيوم بيروح منّا ! ، على الرغم من كل شئ  ، أحبه ! مابيه يبعد ..
مو انانيـه هذي بس أنا عارفه تبعات هالموضوع .. مابي حواجز بيني وبينه أكثر من الحواجز اللي كانت موجوده ..
ضاقت فيني الدنيا وبكيت ! وانهرت !
بس تناسيت ! او نسيت ! انها كانت محتاجتني أكثر من حاجتي أنا لشئ يوقف دموعي !
كانت ماما محتاجه أحد يضمها وتبكي على صدره !
وياليت كان هلاأحد أنا !
قست علينا الايام كثير
عشت انا لحالي وهي لحالها بس كلنا نواجه ألم ! رغم أن ألمها كان أقوى من ألمي ..
مر شهرين .. وتركها !
وعرف إنه مابيوم بيلقا مكـان وقلوب يتحتويه ! وتغنيه عن فلوس وبيوت وبنات الدنيا كلها ، غيرنا ..
بس للأسف ظلت الحواجز ..
والله العظيم ماكان بيدي !
والله والله والله !
عجزت أكسرها .. كل ماجيت بأكسرها ! يجي يحط طوبه !
تعبت .. الموقف أكبر مني .. كنت دائماً أدعي ” يارب يارب حنن قلبه ! يارب رده لنا رداً جميلاً ” يارب !
كنت أبي أقوي ماما ! كنت أبي أعكس قوه العالم كلها لها ..
بس ماقدرت !
خذلت نفسي قبل لا أخذلها ..
ماقدرت ! كانت المواقف كلها أكبر مني ..
أبي أمسكها وأخذ منها كل همومها والله العظيم أبي ..
ما أبي أي ألم يستوطن قلبها !
لكنيّ مو قد أني أدخل قلبها مليييااان حكايا أكبر من أني أشيلها ..
تعبت .. لأني خذلت نفسي ، وخذلتها ، ولأني ماعدت أحس بالأمان اللي كنت أحس فيه !
صرت بنت أبيض وأسود ..
ماعادت فيه ألوان تلونّ حياتي .. ولا عدت أقدر ألونها ..
أشين شئ يحس فيه الانسان لما يحس اللي حوله يتألمون .. ويناظرونه وينتظرون يده تجي تساعدهم ! وهو يده مشلوله ..
أشين شئ لما يمشييي ويتعبببببببب ولايلقا جدار يستند عليه !
عمري ماوثقت في احد ، كنت أحس أني أنا قادره أعيش لحالي بدون أي أحد غريب !
كنت أحس أهلي مكفيني
وهم مكفيني فعلاً
لكن لابد بيوم الواحد بيحتاج احد ! لابد !
خصوصاً لمايكون مثلي ..
وقت ماكنت أتهواى وقت ما كنت زي الورده اللي تذبل ، وقت ماكنت انسانه تطيح في كل شئ ! وتفقد نفسها كل شوي ..
كانو ناس حولي يسألون .. ليه ؟
بس ماكنت أبي أحكي ! لاني ادري لو حكيت كل شئ داخلي بيكبر ..
ربي خلقني انسانه اذا حكيت الامي تكبر .. أفضل أحتفظ فيها جوّا ولا أنها تطلع تتعرض لأيدي الطفيليين
مهما كانت نيتاتهم !
مرت سنه .. وكل مره ابعد .. كثير ناس كرهتني ! كثير ناس لامتني على بعدي ! بس ماحد فيهم قال ( ليه ؟ )
صحيت في يوم من الأيام في 2008 .. على مُر حقيقتي ! ومُر الشئ الللي سويييته !
ومُر اني انسانه بلاهويّة .. مُر اني كل هالشهور قاعده أسوي شئ غلط ! وأكبر غلط !
مُر اني اهملت علاقتي بربي وانها وقتها كانت ( زيرو ) !
مُر إن مافيه فرق بيني وبين القطوه اللي في الشارع !
مُر اني صرت ولاشئ !
زيي زي أي كائن بلا هدف ! بلا هويّه ! بلا مبدأ ! بلا شئ يميّزه عن باقي الجمادات ! غارق بكل الاشياء التافهه !
قمت بسرعه من سريري .. أخذت شاور .. كان فوق جلدي زي الطبقه اللي مغيرتني ! انسانه ثانيه ! انا مب هذي !
صليت وبكييييت كثييييييييييييييييييييييييييييييير
كنت أظن إني وحيده ! ونسيت ان اللي خلقني موجود .. موجود بس انا غفلت عن هالشئ
حسيت يالله !! يالله قد ايششششش من جد ما تسوى هالدنيا !
ليه نعطيها أكبر من حجمها ؟
دعيت كثييير .. قلت يارب ساعدني ! يارب نور بصيرتي! يارب دلني على الطريق الصواب ! يارب ارني الحق حقاً وارزقني اتباعه ، وارني الباطل باطلاً وارزقني اجتنابه
لما انتهيت ..
ناظرت نفسي في المرايه ! ماتغيرت! طيب ليه داخلي تغير ؟ اللي صار موب لهدرجه كثير كبير .. انا ليه كذا منكسره ؟ وين المشكله بالضبط ؟
ليه كلهم عايشين .. كل اخواني عايشين ولا اهتمّوا لشئ !
كنت أقول ايه لأنهم أولاد !
بس معليش وش الفرق ؟ كلنا نحسّ ! وش الفرق بين ولد وبنت ؟
المشكله مو هنا ..
المشكله نابعه من داخلي !
انا اساس المشكله !
جبت ورقه وقلم .. وكتبت كل شئ بخاطري .. حكيت لكل الناس! ووو لـولا أحد .. ولنفسي !
مابقيت ولاشئ ولاشئ !
طلعت .. من غرفتي ! شفت العالم .. بس تذكرت اني للحين منيب مهيأه لاني أقابل الكل .. لازم اصلحني بعدين أوريهم ..
وتغيرت!
وجت 2009 وانا انسانه ثانيه ..
اقوى .. أجمل .. أكثر حكمه !
على الرغم ان المشوار باقي فيه كثير ! مابي أوصل للكمال بس أبي أوصل للأفضليّه ..
كثير ناس أبغا أقولهم شكراً ..
شكراً شكراً يمه .. شكراً ياجدتي الجميله ! شكراً شكراً شكراً شكراً ولاتكفي والله !
شكراً أهلي جميعاً .. من يستحق ومن لايستحق!
شكراً نوف .. شكراً حصه .. شكراً شكراً
شكراً أصدقائي من خلف الشاشه ! شكراً كثيراً ..

شكراً .. للـ 2009 كانت جميله ..

وقبل كل شئ .. ” الحمد والشكر لله ” ..!!

أنا أتغير ؟ إذاً أنا أعيش ..



~ بواسطة Bushra على ديسمبر 6, 2009.